அம்பிகா பணத்தை மோசடி செய்தது எப்படி? காவல்துறைக்கு நடிகை ராதா எழுதிய புகாரின் முழு விவரங்கள்...
நான் சென்னைக்கு வரும்போதெல்லாம் வளசரவாக்கத்தில் உள்ள எனது வீட்டின் தரைத்தளப் பகுதியில்தான் தங்குவேன். அதே தரைத்தளப் பகுதியில் தங்கியிருந்த எனது சகோதரி அம்பிகா நாயர், உறவுமுறை என்ற முறையில் எனது பகுதிக்கு வந்து செல்ல நான் அனுமதி அளித்திருந்தேன். எனது தொழிலாளர்களின் சம்பளம், கரண்ட் பில், சொத்துவரி, குடிநீர் மற்றும் கழிவுநீர்க் கட்டணம், தோட்டம் பராமரிப்புச் செலவுகள் போன்றவற்றை நான் இல்லாத நேரத்தில் செலுத்துவதற்காக, எனது அறையில் 5 அல்லது 6 கையொப்பமிட்ட காலிக் காசோலைகளை (Blank Cheques) மட்டும் வழக்கம் போல வைப்பதுண்டு.
இதற்கிடையில், எனது வணிகத்தின் பெயரை 'ஏ.ஆர்.எஸ் கார்டன் ஸ்டுடியோ' என்பதிலிருந்து 'ஆர்.ஆர் கார்டன்' என மாற்றினேன். இது பற்றிக் வங்கியில் முறையான தகவல் தெரிவிக்கப்பட்டதை அடுத்து, எனது நடப்புக் கணக்கின் (Current Account) பெயர் மாற்றப்பட்டு புதிய காசோலை புத்தகம் வழங்கப்பட்டது. புதிய செக் புக் கைக்கு வந்த பிறகு, பழைய காசோலை புத்தகத்தைப் பயன்படுத்துவதை நான் முற்றிலுமாக நிறுத்திவிட்டேன்; அது செல்லாது என்பதால் அதைப்பற்றி நான் நினைவுகொள்ளவே இல்லை.
இந்நிலையில், கடந்த 17.09.2026 அன்று எனது வங்கியிலிருந்து வந்த மின்னஞ்சல் (Email) எனக்குப் பெரும் அதிர்ச்சியைத் தந்தது. அந்தப் பழைய காசோலைகள் எனது சகோதரி அம்பிகா நாயரின் பெயரில் பணப் பரிமாற்றம் செய்வதற்காகத் தாக்கல் செய்யப்பட்டுள்ளதாக அதில் கூறப்பட்டிருந்தது. உடனடியாக நான் எனது வங்கியைத் தொடர்புகொண்டு, அவை திருடப்பட்டுச் சட்டவிரோதமாகத் தவறாகப் பயன்படுத்தப்பட்டுள்ளதால் அந்தப் பரிவர்த்தனையை உடனே நிறுத்துமாறு கேட்டுக்கொண்டேன்.
எந்தவொரு சட்டப்பூர்வக் கடனுக்காகவோ அல்லது பொறுப்புக்காகவோ நான் எனது சகோதரி அம்பிகா நாயருக்கு அந்தக் காசோலைகளை வழங்கவேயில்லை. சொல்லப்போனால், எனக்கும் எனது சகோதரிக்கும் இடையே எப்போதுமே எந்தவிதமான பணப் பரிவர்த்தனையும் நடந்ததில்லை. வங்கி அதிகாரிகளிடம் நான் மேற்கொண்ட விசாரணையில், அந்தக் காசோலைகளில் எனது மற்றொரு சகோதரரான திரு. மல்லிகார்ஜுனா குஞ்சன் நாயர்தான் தனது கைப்பட விவரங்களை எழுதியுள்ளார் என்பது தெரியவந்தது.
இதிலிருந்து, எனது சகோதரி அம்பிகா நாயரும், சகோதரர் மல்லிகார்ஜுனா குஞ்சன் நாயரும் திட்டமிட்டு என்ன ஏமாற்றவும் மோசடி செய்யவும் கூட்டுச்சதி செய்துள்ளனர் என்பது தெளிவாகிறது. நான் இல்லாத நேரத்தில் எனது அறைக்குள் அத்துமீறி நுழைந்து, கையொப்பமிட்டு வைக்கப்பட்டிருந்த காலிக் காசோலைகளைத் திருடி, அதில் தங்களுக்குப் பிடித்தமான பெயர், தேதி மற்றும் தொகையை நிரப்பி வங்கியில் பணம் பெற முயன்றுள்ளனர். இது முற்றிலும் சட்டவிரோதக் செயலாகும். அதுமட்டுமின்றி, எனது அறையில் வைக்கப்பட்டிருந்த தங்கம், வைர நகைகள், சொத்து மற்றும் வங்கி ஆவணங்கள், பதிவேடுகள் போன்ற மதிப்புமிக்கப் பொருட்களைப் பார்வையிட விடாமலும் அவர்கள் தடுத்து வருகின்றனர்.
Edited by Siva
