கமல்ஹாசன் காஃபி கொடுத்தார், பாதிக்குமேல் என்னால் பருகமுடியவில்லை: வைரமுத்து

மகா கவிதை என்ற நூல் வெளியீட்டு விழா விரைவில் நடைபெற இருக்கும் நிலையில் இதில் கமல்ஹாசன் சிறப்பு விருந்தினராக கலந்து கொள்ள உள்ளார். இந்நூல் வைரமுத்துவின் 39வது நூல் ஆகும். இதற்கான அழைப்பிதழை வைரமுத்து கமல்ஹாசனிடம் நேரில் கொடுத்தபோது  நிகழ்ந்த நிகழ்வுகள் குறித்து கவிதை வடிவில் வைரமுத்து தனது சமூக வலைதளத்தில் தெரிவித்துள்ளார். அதில் கூறி இருப்பதாவது:

மகா கவிதை

வெளியீட்டு விழாவில்

வாழ்த்துரை வழங்க வருகைதரும்

கலைஞானி 

கமல்ஹாசனைச் சந்தித்து

அழைப்பிதழும் நூலும் வழங்கினேன்

எனக்கும் அவருக்கும்

இடையிலிருந்த நாற்காலியில்

42ஆண்டு நினைவுகள்

அமர்ந்திருந்தன

கலை அரசியல் மதம் என்று

தவளைக்கல்லாய்த் தாவித்தாவி

எண்ணூர்

எண்ணெய்ப் பிசுக்கில்

இடறி நின்றது உரையாடல்

குடிதண்ணீர்

எண்ணெய் ஆவதும்

எண்ணெய்

தண்ணீரின் ஆடையாவதும்

காலங்காலமாய்க் 

கழுவப்படாத

கண்ணீர்ப் பிசுக்கில்

எண்ணெய்ப் பிசுக்கும்

ஏறி நிற்பதும்

மீனென்ற 

வேட்டைப் பொருளும்

கொக்கென்ற 

வேட்டையாடு பொருளும்

சேர்ந்து செத்து மிதப்பதும்

நதி இறங்க 

வழியில்லாத கடலில்

எண்ணெய் இறங்குவதும்

உழைக்கும் மக்கள்

பிழைக்க வழியின்றிப்

பெருந்துயர் கொள்வதும் 

எத்துணை கொடுமையென்று

சோகம் பகிர்ந்தோம்

‘இதற்கு யார் பொறுப்பு’

என்றார் கமல்

‘லாபம் ஈட்டும்

நிறுவனம்’ என்றேன்

காஃபி கொடுத்தார்

பாதிக்குமேல் என்னால் 

பருகமுடியவில்லை

Edited by Mahendran