சீனாவிலும் வெற்றி பெறும்.. மகாராஜா படத்தை வாழ்த்திய சிவகார்த்திகேயன்..!

விஜய் சேதுபதியின் 50 ஆவது படமான மகாராஜா ஜூன் 12 ஆம் தேதி ரிலீஸாகி பிளாக்பஸ்டர் ஹிட்டானது. இந்த படத்தில் அனுராக் காஷ்யப், மம்தா மோகன்தாஸ், நட்ராஜ் நட்டி மற்றும் பாய்ஸ் மணிகண்டன் மற்றும் சிங்கம்புலிஆகியோர் முக்கிய வேடத்தில் நடித்துள்ளனர். கடந்த காலங்களில் விஜய் சேதுபதியின் எந்த படமும் தொடாத வசூல் சாதனையை மகாராஜா செய்துள்ளது.

இந்த படம் திரையரங்குகள் மூலமாக மட்டுமே 100 கோடி ரூபாய்க்கு மேல் வசூலித்துள்ளது. இந்நிலையில் இந்த படம் சில தினங்களுக்கு முன்னர் நெட்பிளிக்ஸ் ஓடிடியில் வெளியாகி பல நாடுகளில் நம்பர் 1 இடத்தில் ட்ரண்டிங்கில் இருந்தது. அதன் பின்னர் நெட்பிளிக்ஸ் தளத்தில் அதிகமாகப் பார்க்கப்பட்ட இந்தியப் படங்களின் வரிசையில் முதலிடத்துக்கு சென்றது. நெட்பிளிக்ஸில் இந்த படம் 150 கோடி ரூபாய்க்கு மேல் லாபத்தை ஈட்டியுள்ளதாக சொல்லப்படுகிறது. மேலும் சென்னையில் ஒரு திரையரங்கில் 100 நாட்களைக் கடந்து ஓடியது.

இந்நிலையில் இன்று சீனாவில் இந்த படம் 40000 திரையரங்குகளில் ரிலீஸாகிறது. இதையடுத்து நடிகர் சிவகார்த்திகேயன் படக்குழுவை வாழ்த்தியுள்ளார். அவரது பதிவில் “மகாராஜா படம் சீனாவில் ரிலீஸாவது மிகவும் பெருமையாக உள்ளது. அங்கும் இந்த படம் மிகப்பெரிய வெற்றியைப் பெறும். எல்லைகளைக் கடந்து சாதிக்கும் படத்தை உருவாக்கிய குழுவினருக்கு வாழ்த்துகள்” எனக் கூறியுள்ளார்.