ரெய்னாவின் இடத்துக்கு அவர்தான் சரியாக இருப்பார்… ஷேன் வாட்சன் பரிந்துரைக்கும் வீரர்!
Last Updated:
வெள்ளி, 11 செப்டம்பர் 2020 (11:14 IST)
சி எஸ் கே அணியில் இருந்து ரெய்னா வெளியேறியுள்ள நிலையில் அவருக்குப் பதிலாக முரளி விஜய்யை தேர்வு செய்தால் பொருத்தமாக இருக்கும் என வாட்ஸன் தெரிவித்துள்ளார்.
சென்னை சூப்பர் கிங்ஸ் அணியைப் பொறுத்த வரை தல தோனி என்றால் தளப்தி ரெய்னாதான். தோனியின் ஓய்வுக்குப் பின் அணியை வழிநடத்த போவதே அவர்தான் என ரசிகர்கள் நம்பிக்கொண்டிருந்த நிலையில் , துபாயில் பயிற்சிக்காக சென்றிருந்த ரெய்னா திடீரென இந்தியா கிளம்பி வந்தார்.
இது சம்மந்தமாக பல சர்ச்சைகள் உருவாகி பிறகு சமாதானப் பேச்சுகள் எழுந்தன. ஆனால் எந்தவொரு முடிவும் எடுக்கப்படவில்லை. அதனால் எப்படியும் இந்த ஆண்டு ரெய்னா விளையாடுவது சந்தேகம் என்ற சூழல் உருவாகி உள்ளது. இந்நிலையில் இப்போது ரெய்னாவுக்கு பதில் அணியில் யார் என்ற கேள்வி எழுந்துள்ளது.
இதற்கு சி எஸ் கே அணியின் தொடக்க ஆட்டக்காரர்களில் ஒருவரான ஷேன் வாட்சன் பதிலளித்துள்ளார். அதில் ‘ரெய்னாவின் இடத்தை யாராலும் நிரப்ப முடியாது. ஏனென்றால் ஐபிஎல் வரலாற்றிலேயே அதிக ரன்கள் அடித்த வீரர்கள் பட்டியலில் அவர் இரண்டாம் இடத்தில் உள்ளார். ஆனாலும் முரள் விஜய்யை தேர்வு செய்தால் அது பொருத்தமாக இருக்கும். ஏனென்றால் சுழல் பந்து வீச்சுக்கு சாதகமான துபாய் மைதானங்களில் விஜய்யால் சிறப்பாக செயல்பட முடியும்.’ எனக் கூறியுள்ளார்.
முரளி விஜய் சி எஸ் கே அணிக்காக பல ஆண்டுகளாக விளையாடி வந்தார். ஆனால் கடந்த சில சீசன்களாக அவர் அணிக்குள் தேர்வு செய்யப்படவில்லை என்பது குறிப்பிடத்தக்கது.
