பாஜக வேட்பாளராக போட்டியிடும் அஜித் பட நடிகர்
மக்களவை தேர்தல் வரும் ஏப்ரல் 11 முதல் ஆரம்பமாகவுள்ள நிலையில் தேசிய கட்சிகளான பாஜகவும், காங்கிரசும் பல கட்டங்களாக வேட்பாளர் பட்டியலை அறிவித்து வருகிறது. நேற்று காங்கிரஸ் கட்சியின் 20 வேட்பாளர்கள் கொண்ட பட்டியல் வெளியான நிலையில் சற்றுமுன் பாஜகவின் 3 வேட்பாளர் பட்டியல் வெளியாகியுள்ளது
இதன்படி கேரள மாநிலம் திருச்சூரில் பிரபல மலையாள நடிகர் சுரேஷ்கோபி போட்டியிடவுள்ளார். இவர் அஜித் நடித்த 'தீனா', ஷங்கர் இயக்கிய 'ஐ' உள்பட ஒருசில தமிழ்ப்படங்களிலும் நடித்துள்ளார்.
மேலும் இந்த வேட்பாளர் பட்டியலில் குஜராத் மாநிலத்தின் மஹசேனா தொகுதியில் ஷ்ரதா பென் பட்டேல் போட்டியிடவுள்ளதாகவும், சூரத் தொகுதியில் தர்ஷனா ஜர்தோஷ் போட்டியிடவுள்ளதாகவும் அறிவிக்கப்பட்டுள்ளது.
இந்த மூவருடன் சேர்ந்து மொத்தம் இதுவரை 377 பாஜக வேட்பாளர்கள் பெயர்கள் அறிவிக்கப்பட்டுள்ளது என்பது குறிப்பிடத்தக்கது
