கோலி நினைக்கும் வரை அவர் டெஸ்ட் விளையாட வேண்டும்… இல்லை என்றால் இந்தியாவுக்குதான் இழப்பு – ஆஸி முன்னாள் வீரர் கருத்து!

இந்தியா மற்றும் ஆஸ்திரேலியா அணிகளுக்கு இடையே நடந்து முடிந்த பார்டர் கவாஸ்கர் கோப்பைத் தொடரில் ஆஸ்திரேலியா 3-1 என்ற கணக்கில் வென்றுள்ளது. 10 ஆண்டுகளுக்கு பிறகு இந்திய அணி பார்டர் கவாஸ்கர் கோப்பைத் தொடரை இழந்துள்ளது. இந்த தொடரில் பெரிதும் எதிர்பார்க்கப்பட்ட ஆஸி மண்ணில் சிறப்பாக விளையாடக் கூடியவரான கோலி ஒரே ஒரு சதத்தை தவிர மற்ற இன்னிங்ஸ்களில் சொதப்பினார்.

கோலியைப் பொறுத்தவரை கடந்த சில ஆண்டுகளாக அவர் ஒரே மாதிரியாக தன்னுடைய விக்கெட்டை இழந்து வருகிறார். ஆஃப் ஸ்டம்புக்கு வெளியே செல்லும் பந்துகளில்தான் அவர் அதிகமுறை  கேட்ச் கொடுத்து அவுட் ஆகி  வெளியேறுகிறார். ஆனால் அந்த பந்துகளை அடிக்காமல் விட்டு கூடுதல் ரன்களை சேர்க்க வேண்டும் என அறிவுறுத்தி வருகின்றனர் முன்னாள் வீரர்கள். ஆனால் கோலி பிடிவாதமாக அந்த பந்துகளை ஆடி விக்கெட்டை இழந்து வருகிறார் என்பதுதான் சோகம்.

இந்நிலையில் அவர் டெஸ்ட் கிரிக்கெட்டில் இருந்து ஓய்வு பெற்றுவிடுவது நல்லது என விமர்சனங்கள் எழுந்துள்ளன. இது குறித்து பேசியுள்ள ஆஸி அணியின் முன்னாள் கேப்டன் மைக்கேல் க்ளார்க் “கோலி ஆசைப்படும் வரை அவரை டெஸ்ட் கிரிக்கெட் விளையாட அனுமதிக்க வேண்டும். அவர் ஓய்வு பெற்றால் அது இந்திய அணிக்குதான் நஷ்டம். நாளைக்கேக் கூட அவர் ஒரு இரட்டை சதம் அடிக்கலாம். அந்த அளவுக்குத் திறமையான வீரர் அவர்” எனக் கூறியுள்ளார்.