கோட் படத்தில் விஜயகாந்த் காட்சிகள் இருக்குமா?... விஜய் கையில் இருக்கிறது இறுதி முடிவு!

விஜய் அரசியலில் இறங்கப் போவதால் தற்போது நடித்து வரும் கோட் படத்துக்குப் பிறகு இன்னும் ஒரு படத்தில் மட்டுமே நடிப்பேன் என அறிவித்துள்ளார். இதனால் தற்போது அவர் நடித்து வரும் GOAT திரைப்படத்தின் மீது மிகப்பெரிய அளவில் எதிர்பார்ப்பு எழுந்துள்ளது. இந்த படத்தில் அவரோடு பிரசாந்த்,பிரபுதேவா, மீனாட்சி சௌத்ரி, ஜெயராம் மற்றும் மோகன் ஆகியோர் நடிக்கின்றனர். யுவன் ஷங்கர் ராஜா இசையமைக்க, சித்தார்த்தா நுனி ஒளிப்பதிவு செய்து வருகிறார். படத்தை ஏஜிஎஸ் நிறுவனம் தயாரித்து வருகிறது.

படத்தின் பெரும்பாலானக் காட்சிகள் படமாக்கப்பட்டு விட்ட நிலையில் செப்டம்பர் 5 ஆம் தேதி இந்த படத்தின் ரிலீஸ் என அறிவிக்கப்பட்டுள்ளது. இந்நிலையில் இந்த படத்தில் மறைந்த நடிகர் கேப்டன் விஜயகாந்த் ஏ ஐ தொழில்நுட்பம் மூலமாக ஒரு கதாபாத்திரமாக உருவாக்கப்பட உள்ளார் என செய்திகள் வெளியாகின. இதை விஜயகாந்தின் மனைவி பிரேமலதாவும் உறுதிப்படுத்தியிருந்தார். அதன்படி விஜயகாந்த் இடம்பெறும் காட்சி படத்தில் இரண்டரை நிமிடங்கள் வரும் என சொல்லப்படுகிறது. மேலும் அவர் இடம்பெறும் காட்சிக்கு படத்தின் க்ளைமேக்ஸுக்கு முன்பாக வரும் என்றும் சொல்லப்பட்டது.

இந்நிலையில் இப்போது வெளியாகியுள்ள தகவலின் படி விஜயகாந்த் வரும் காட்சிகள் நம்பகத்தன்மையோடு இருக்க வேண்டும் என விஜய் உறுதியாக இருக்கிறாராம். அந்த காட்சிகள் நம்பகத்தன்மை இல்லாமல் அமெச்சூராக  இருந்தால் அதை படத்தில் வைக்க விடமாட்டேன் என விஜய் கூறியுள்ளாராம். அதனால் அந்த காட்சிகள் எல்லாம் மிகுந்த சிரத்தையோடு உருவாக்கப்பட்டு வருகின்றனவாம்.