சென்னை - திருச்செந்தூர், சென்னை - ராமேஸ்வரம் ரயில் சேவையில் மாற்றம்.. பயணிகள் அவதி...!

சென்னை - திருச்செந்தூர், சென்னை - ராமேஸ்வரம் ரயில் சேவையில் மாற்றம் செய்யப்பட்டுள்ளதாக தென்னக ரயில்வே அறிவித்துள்ளதால் பயணிகள் அவதியடைந்துள்ளனர்.

விக்கிரவாண்டி - முண்டியம்பாக்கம் இடையே உள்ள ரயில்வே பாலம் மற்றும் திருக்கோவிலூர் - தண்டரை இடையே உள்ள ரயில்வே பாலத்தில் தண்ணீர் தேங்கியுள்ளதால் சில ரயில்கள் சேவையில் மாற்றம் செய்யப்பட்டுள்ளது. இதுகுறித்து தென்னக ரயில்வே வெளியிட்டுள்ள செய்திக்குறிப்பில் கூறப்பட்டுள்ளதாவது:

சென்னை எழும்பூர் - திருச்செந்தூர் அதிவிரைவு ரயில்(20605) மாலை  4.10 மணிக்கு சென்னை எழும்பூரில் இருந்து கிளம்பவிருந்த நிலையில் இன்று விழுப்புரத்தில் இருந்து புறப்படும். சென்னை எழும்பூர் - விழுப்புரம் இடையே பகுதியாக ரயில் சேவை ரத்து செய்யப்பட்டுள்ளது. 

மேலும், ரத்து செய்வதாக அறிவிக்கப்பட்ட சென்னை எழும்பூர் - மன்னார்குடி ரயில்(16179) சென்னை எழும்பூரில் இருந்து இன்று இரவு 10.55 மணிக்குப் பதிலாக 11.55 மணிக்குப் புறப்படும். 

பிர்சாபூர் - ராமேஸ்வரம் அதிவிரைவு ரயில்(20498) வழித்தடம் மாற்றப்பட்டுள்ளது. இது சென்னை எழும்பூர், சென்னை கடற்கரை, அரக்கோணம், காட்பாடி, சேலம், கரூர், திருச்சி வழியாகச் செல்லும். தாமதமாக புறப்படும் ரயில்கள்:சென்னை எழும்பூர் - கொல்லம் அதிவிரைவு ரயில்(16101) எழும்பூரில் இருந்து இன்று மாலை 5 மணிக்குப் பதிலாக 6 மணிக்குப் புறப்படும். 

சென்னை எழும்பூர் - ராமேஸ்வரம் அதிவிரைவு ரயில்(22661) எழும்பூரில் இருந்து இன்று மாலை 5.45 மணிக்குப் பதிலாக 6.45 மணிக்குப் புறப்படும். சென்னை எழும்பூர் - கன்னியாகுமரி ரயில் எழும்பூரில் இருந்து இன்று மாலை 5.20 மணிக்குப் பதிலாக 6.20 மணிக்குப் புறப்படும்..

இவ்வாறு அந்த செய்திக்குறிப்பில் கூறப்பட்டுள்ளது.

Edited by Mahendran