கூகுள் ஜெமினி லைவ்: கேமரா கட்டுப்பாட்டிற்கான புதிய அப்டேட்.. பயனர்கள் தனியுரிமை காப்பாற்றப்படுமா?

கூகுள் நிறுவனம் தனது ‘ஜெமினி லைவ்’ தொழில்நுட்பத்தில் பயனர்களின் தனியுரிமையை பாதுகாக்கும் வகையில் ஒரு புதிய வசதியை உருவாக்கி வருகிறது. இதன் மூலம் ஜெமினி லைவ்-இல் உள்ள Guided Vision அம்சத்தை பயனர்கள் தங்களுக்கு தேவைப்படும்போது ஆஃப் செய்து கொள்ள முடியும். ஆன்ட்ராய்டுக்கான கூகுள் ஆப்பின் சோதனை பதிப்பில் இந்த புதிய அம்சம் கண்டறியப்பட்டுள்ளது.

பொதுவாக, கைடட் விஷன் அம்சம் என்பது மொபைல் கேமரா மூலம் நம்மைச் சுற்றியுள்ள பொருட்களைப் பார்த்து, அதற்கேற்ப ஜெமினி ஏஐ உடனுக்குடன் ஆலோசனைகளை வழங்கும் ஒரு தொழில்நுட்பமாகும். பிக்சல் 10 மொபைல்களுடன் அறிமுகமான இந்த வசதி, பொருட்கள் வாங்குவதற்கும், சுற்றியுள்ள பொருட்களைப் பற்றி அறிந்து கொள்வதற்கும் உதவியாக இருந்தது.

இருப்பினும், கேமரா எப்போதும் ஆன்லைனில் இருப்பது பயனர்களின் தனியுரிமை குறித்த அச்சத்தை ஏற்படுத்தியது. இதைக் கருத்தில் கொண்டு, கூகுள் நிறுவனம் பயனர்கள் தங்களின் கேமரா அனுமதியைத் தாங்களே கட்டுப்படுத்தும் வகையில் இந்த புதிய Toggle சுவிட்சை அறிமுகம் செய்யவுள்ளது. 

இதன் மூலம் பயனர்கள் தங்களின் தரவுகள் மற்றும் தனியுரிமை மீது கூடுதல் கட்டுப்பாட்டைப் பெற முடியும். இந்த வசதி எப்போது அதிகாரப்பூர்வமாக வெளியாகும் என்ற அறிவிப்பை கூகுள் விரைவில் வெளியிடும் என எதிர்பார்க்கப்படுகிறது.

Edited by Siva