பல வருடங்களுக்குப் பிறகு கோடிட்ட இடங்களை நிரப்புக என்ற படத்தை இயக்கினார் பார்த்திபன். டிசம்பர் மாதம் 23 -ஆம் தேதி படத்தை வெளியிடுவதாக இருந்தார். வேறு படங்கள் குவிந்ததால் டிசம்பர் 30 -க்கு படவெளியீட்டை மாற்றினார்.
பொங்கலுக்கு படத்தை வெளியிட்டால் விடுமுறை தினத்தில் அதிகம்பேர் பார்க்க வாய்ப்பிருக்கிறது என்று ஜனவரி 12 -ஆம் தேதிக்கு வெளியீட்டை மாற்றினார். அன்றுதான் விஜய்யின் பைரவாவும் வெளியாகிறது.
திரையரங்கு உரிமையாளர்கள் பைரவாவுக்கு முன்னுரிமை பின்னுரிமை உள்பட எல்லா உரிமைகளும் கொடுப்பதால், கோடிட்ட இடங்களை நிரப்புக படத்துக்கு தேவையான அளவு திரையரங்குகள் கிடைக்கவில்லை. அதனால் ஜனவரி 14 -ஆம் தேதிக்கு வெளியீட்டை மீண்டும் தள்ளி வைத்துள்ளார்.
இந்த தேதியிலும் திரையரங்குகள் கிடைக்கவில்லை என்றால், பிப்ரவரி மாதத்துக்கு படவெளியீட்டை தள்ளி வைப்பதை தவிர வேறு வழியில்லை என கூறியுள்ளார். அவர் பேசுவதைப் பார்த்தால் கோடிட்ட இடங்களை நிரப்புக பிப்ரவரியில்தான் வரும் போலிருக்கிறது.
