இது நடிகரின் குரல் இல்லை மனதின் குரல்: சூர்யா அறிக்கைக்கு பாரதிராஜா பாராட்டு

பிரபல நடிகர் சூர்யா நேற்று நீட்தேர்வு குறித்தும், நீட் தேர்வால் மாணவர்கள் தற்கொலை செய்தது குறித்தும் ஒரு நீண்ட அறிக்கையை வெளியிட்டார் என்பதை பார்த்தோம். இந்த அறிக்கை சமூக வலைதளங்களில் பெரும் பரபரப்பை ஏற்படுத்தியது 

சூர்யாவுக்கு ஆதரவாக ஹேஷ்டேக் ஒன்றை உருவாக்கி அதனை சூர்யா ரசிகர்கள் டிரெண்டாக்கி வருகின்றனர். ஆனால் அதே நேரத்தில் சூர்யாவின் அறிக்கைக்கு எதிராக கண்டன கருத்துக்களும் பதிவாகி வருகின்றன என்பது குறிப்பிடத்தக்கது 

இந்த நிலையில் சூர்யாவின் அறிக்கைக்கு பல திரையுலக பிரபலங்கள் பாராட்டு தெரிவித்துள்ளனர். அந்த வகையில் சூர்யாவுக்கு எப்போதும் ஆதரவாக இருக்கும் இயக்குனர் இமயம் பாரதிராஜா அவர்கள் தனது டுவிட்டரில் இதுகுறித்து கூறியதாவது:

ஒவ்வொரு வரிகளிலும் தம்பி சூர்யா ஓர் தகப்பனாராக கூறியுள்ளார். இது நடிகரின் குரல் இல்லை மனதின் குரல் என்று பாரதிராஜா தனது டுவிட்டரில் கூறியுள்ளார் பாரதிராஜாவின் இந்த டுவிட்டுக்கு சூர்யா ரசிகர்கள் நன்றி தெரிவித்து வருகின்றனர்.

ஆனால் அதே நேரத்தில் இந்த டுவிட்டர் பக்கம் பாரதிராஜாவின் போலி டுவிட்டர் பக்கம் என்றும், அவர் சூர்யாவின் அறிக்கை குறித்து எந்த கருத்தையும் தெரிவிக்கவில்லை என்றும் கூறப்பட்டு வருகிறது.