பாலா நிறைய படம் பண்ணுங்க… வணங்கான் மேடையில் மணிரத்னத்தின் அட்வைஸ்!

இயக்குனர் பாலா இயக்கத்தில் சூர்யா நடிப்பில் உருவான வணங்கான் திரைப்படம் கிடப்பில் போடப்பட்ட நிலையில் அதன் பிறகு அந்த படத்தில் அருண் விஜய் கதாநாயகனாக நடித்தார். மற்ற முக்கியக் கதாபாத்திரங்களில், ரோஷினி ஹர்ப்ரியன், சமுத்திரக்கனி மற்றும் மிஷ்கின் ஆகியோர் நடிக்கின்றனர். இந்த  படத்தை இயக்குனர் பாலா மற்றும் மாநாடு படத்தின் தயாரிப்பாளர் சுரேஷ் காமாட்சி ஆகியோர் இணைந்து தயாரித்து வருகின்றனர். படம் முடிந்து பின் தயாரிப்புப் பணிகள் நடந்து வருகின்றன. ஜனவரி 10 ஆம் தேதி படம் ரிலீஸாகிறது.

இந்நிலையில் இயக்குனர் பாலாவின் வணங்கான் படத்தின் இசை வெளியீடும், அவரின் 25 ஆண்டுகால திரைவாழ்க்கையைக் கொண்டாடும் நிகழ்வும் நேற்று சென்னையில் நடந்தது. இதில் ஏராளமான திரையுலகப் பிரபலங்கள் கலந்துகொண்டு பேசினார்.

அதில் சிறப்பு விருந்தினராகக் கலந்துகொண்டு பேசிய மணிரத்னம் “பாலா ரொம்ப தாமதமாகப் படங்கள் பண்ணுகிறார். அவரிடம் நான் ‘நிறைய படங்கள் தமிழ் சினிமாவோட தரத்த கீழக் கொண்டுபோகுது. அதனால் நீங்க அதிகமாகப் படம் பண்ணுங்க’ என்பேன். எல்லோருக்கும் பாலா இயக்குனர். ஆனால் எனக்கு அவர் ஹீரோ. அவருடைய சேது படத்தை நான் தியேட்டரில் பார்க்காமல் மிஸ் செய்துவிட்டேன். ஆனால் நந்தா படம் எல்லா துறைகளிலும் சிறப்பாக வந்திருந்தது. அன்றைக்கு அவரை எப்படிப் பார்த்தேனோ, இன்னமும் அப்படிதான் இருக்கிறார்” எனக் கூறியுள்ளார்.