வணங்கான் படத்தில் இருந்து சூர்யா விலகவில்லை… நடந்தது இதுதான் –மனம் திறந்த இயக்குனர் பாலா!

இயக்குனர் பாலா இயக்கத்தில் சூர்யா நடிப்பில் உருவான வணங்கான் திரைப்படம் கிடப்பில் போடப்பட்ட நிலையில் அதன் பிறகு அந்த படத்தில் அருண் விஜய் கதாநாயகனாக நடித்தார். மற்ற முக்கியக் கதாபாத்திரங்களில், ரோஷினி ஹரிப்ரியன், சமுத்திரக்கனி மற்றும் மிஷ்கின் ஆகியோர் நடிக்கின்றனர். இந்த  படத்தை இயக்குனர் பாலா மற்றும் மாநாடு படத்தின் தயாரிப்பாளர் சுரேஷ் காமாட்சி ஆகியோர் இணைந்து தயாரித்து வருகின்றனர். படம் முடிந்து பின் தயாரிப்புப் பணிகள் நடந்து வருகின்றன.

இந்நிலையில் படம் பொங்கல் பண்டிகையை முன்னிட்டு ஜனவரி மாதம் 10 ஆம் தேதியே வணங்கான் படம் ரிலீஸாகும் என அதிகாரப்பூர்வமாக அறிவிக்கப்பட்டுள்ளது. இந்நிலையில் பாலா திரையுலகுக்கு வந்து 25 ஆண்டுகள் நிறைவடைந்ததை அடுத்து அவருக்கான பாராட்டு விழா வணங்கான் படத்தின் ஆடியோ ரிலீஸோடு நடந்தது. அதில் சூர்யா கலந்துகொண்டு பாலா பற்றி புகழ்ந்து பேசியது அனைவரின் கவனத்தையும் ஈர்த்தது.

இந்நிலையில் சமீபத்தில் அளித்த ஒரு நேர்காணலில் பேசிய இயக்குனர் பாலா “வணங்கான் படத்தில் இருந்து சூர்யா விலகவில்லை. நாங்கள் இரண்டு பேரும் சேர்ந்துதான் அந்த முடிவை எடுத்தோம். அவரை வைத்து நிஜ லொகேஷன்களில் ஷூட் செய்யமுடியவில்லை. படத்தின் கதைக்களமும் சுற்றுலாத் தளங்களில் நடப்பது. அவரைப் பார்க்க அவ்வளவு கூட்டம் வருகிறது. நாங்கள் இருவரும் பேசி வேறு படம் பண்ணிக்கொள்ளலாம் என முடிவெடுத்தோம்” எனக் கூறியுள்ளார்.