தீபாவளி பண்டிகைக்காக 35 சிறப்பு ரயில்கள் இயக்கம்: தென் மாவட்டங்களுக்கு மட்டும் 10 ரயில்கள்
தீபாவளி பண்டிகையை முன்னிட்டு பயணிகளுக்கு சிரமம் ஏற்படாமல் இருக்க, 35க்கும் மேற்பட்ட சிறப்பு ரயில்களை இயக்க தெற்கு ரயில்வே திட்டமிட்டுள்ளது. குறிப்பாக, சென்னை நகரத்தில் இருந்து தென் மாவட்டங்களுக்கு 10 சிறப்பு ரயில்கள் இயக்க பரிந்துரை செய்யப்பட்டுள்ளது.
தீபாவளி பண்டிகை அக்டோபர் 31-ம் தேதி கொண்டாடப்பட உள்ள நிலையில், சொந்த ஊர்களுக்கு சென்று வருவதற்காக பயணிகள் அதிக அளவில் முன்பதிவுகளை செய்து முடித்துள்ளனர். குறிப்பாக, சென்னை நகரத்திலிருந்து தெற்கு, மத்திய மற்றும் மேற்கு மாவட்டங்களுக்கு செல்லும் பெரும்பாலான ரயில்களில் முன்பதிவு நிறைந்துள்ளது.
மேலும், சென்னை சென்ட்ரல் மற்றும் எழும்பூர் ரயில் நிலையங்களில் இருந்து அக்டோபர் 29 மற்றும் 30-ம் தேதிகளில் புறப்படும் அனைத்து ரயில்களிலும் முன்பதிவு முழுமையாக முடிவடைந்துள்ளது. இந்த ரயில்களில் ஏறத்தாழ 7,000 பேர் காத்திருப்பு பட்டியலில் உள்ளனர்.
இந்நிலையில், பயணிகளின் வசதிக்காக அக்டோபர் 25 முதல் நவம்பர் 5-ம் தேதி வரை 35-க்கும் அதிகமான சிறப்பு ரயில்களை தெற்கு ரயில்வே இயக்க திட்டமிட்டுள்ளது. அதேபோல் அக்டோபர் 23 முதல் தமிழகம் மற்றும் கேரளா மாநிலங்களில் இருந்து புதுடெல்லி மற்றும் அகமதாபாத் பகுதிகளுக்கு வாரம் இருமுறை சிறப்பு ரயில்கள் இயக்கவும் திட்டமிடப்பட்டுள்ளது.
சென்னை சென்ட்ரல் மற்றும் எழும்பூரிலிருந்து திருநெல்வேலி, நாகர்கோவில், தூத்துக்குடி, கோவை, திருவனந்தபுரம், மங்களூரு, பெங்களூரு, மைசூரு போன்ற இடங்களுக்கு அக்டோபர் 25-ம் தேதி முதல் சிறப்பு ரயில்கள் இயக்கப்படவுள்ளன. இதற்காக, சென்னை மற்றும் எர்ணாகுளத்தில் இருந்து புதுடெல்லி மற்றும் அகமதாபாத் பகுதிகளுக்கு நவம்பர் 15-ம் தேதி சிறப்பு ரயில்கள் இயக்கப்பட உள்ளதாகவும் தகவல் கிடைத்துள்ளது.
இதற்கான அதிகாரப்பூர்வ அறிவிப்பு விரைவில் வெளியாகும் என ரயில்வே வட்டாரங்கள் தெரிவித்துள்ளன.
Edited by Siva
