போதையில் உளறிய அதிமுக அமைச்சர்? - வைரல் வீடியோ

சசிகலாவிற்கு ஆதரவாகவும், ஓ.பன்னீர் செல்வத்திற்கு எதிராகவும், சட்டத்துறை அமைச்சர் சி.வி. சண்முகம் பேசிய வீடியோ சமூக வலைத்தளங்களில் வைரல் ஆகியுள்ளது.

நேற்று முன்தினம் இரவு, சென்னை கடற்கரையில் உள்ள மறைந்த முதல்வர் ஜெயலலிதாவின் சமாதிக்கு சென்ற முதல்வர் ஓ.பன்னீர் செல்வம், அங்கு அதிமுக பொதுச்செயலாளர் சசிகலாவிற்கு எதிராக கொடுத்த பேட்டி, தமிழக அரசியலில் பெரும் பரபரப்பை ஏற்படுத்தியுள்ளது.

அவரின் பேட்டியைக் கண்ட சசிகலா ஆதரவு அதிமுக அமைச்சர்கள், நள்ளிரவே போயஸ் காரடன் சென்றனர். அப்போது அங்கு இருந்த செய்தியாளர்களிடம், ஓ.பன்னீர் செல்வத்திற்கு எதிராக கடுமையான கருத்துகளை பதிவு செய்தனர். அவர் ஒரு துரோகி என்றும், திமுகவிடம் விலை போய் விட்டதாகவும் புகார் கூறினர்.

இதில், அதிமுக சட்டத்துறை அமைச்சர் சி.வி. சண்முகம், ஓ.பி.எஸ்-ஸிற்கு எதிராக கடுமையான கருத்துகளை முன் வைத்தார். அவர் அப்போது மது போதையில் இருந்ததாக கூறப்படுகிறது.