பல படங்களை இயக்கிய பின்னரும் பாலாவுக்கு இணை இயக்குனராக ஏ எல் விஜய்!

சூர்யா பாலா கூட்டணியில் உருவாகும் திரைப்படத்தில் இணை இயக்குனராக பணியாற்ற ஏ எல் விஜய் முடிவு செய்துள்ளாராம்.

இயக்குனர் பாலா இயக்கத்தில் கடைசியாக வெளியான திரைப்படம் நாச்சியார். அதன் பிறகு அவர் இயக்கிய வர்மா திரைப்படம் தயாரிப்பாளரோடு ஏற்பட்ட கருத்து வேறுபாடு காரணமாக அந்த படத்தைக் கிடப்பில் போட்டுவிட்டு வேறொரு இயக்குனரை வைத்து முழுப் படத்தையும் எடுத்து ரிலீஸ் செய்தனர். இதையடுத்து இயக்குனர் பாலாவின் அடுத்த படம் குறித்த எதிர்பார்ப்பு இருந்த நிலையில் சூர்யா நடிப்பில் வணங்கான் படத்தை இயக்குகிறார்.

இதையடுத்து 34 நாட்கள் கன்னியாகுமரியில் முதல் கட்ட படப்பிடிப்பு நடந்தது. இந்நிலையில் படப்பிடிப்புத் தளத்தில் சூர்யாவுக்கும் பாலாவுக்கும் இடையே மோதல் எழுந்து, சூர்யா அங்கிருந்து வெளியேறியதாக தகவல் வெளியாகி பரபரப்பை ஏற்படுத்தியது. ஆனால் அது உண்மையில்லை என்று தயாரிப்பு தரப்பு விளக்கம் அளித்தது.

இதையடுத்து இரண்டாம் கட்டப் படப்பிடிப்பு எப்போது தொடங்கும் என்பதே இழுபறியாக உள்ளது. இந்நிலையில் இப்போது இந்த படத்தில் சூர்யா பாலா தரப்பை இணக்கமாக செய்யும் பொருட்டு இயக்குனர் ஏ எல் விஜய்யை இணை இயக்குனராக இந்த படத்தில் பணியாற்ற உள்ளதாக சொல்லப்படுகிறது. பல படங்களை இயக்கினாலும் எந்த ஈகோவும் பார்க்காமல் ஏஎல் விஜய் இந்த பணியை ஏற்றுக்கொண்டுள்ளதாக சொல்லப்படுகிறது.