இந்தியன் 2 -வில் மாறுபட்ட தோற்றத்தில் கமல்ஹாசன்

பிரம்மாண்ட இயக்குனர் ஷங்கர் இயக்கத்தில் உருவாகும் ’இந்தியன் 2’ படத்தில் கமல்ஹாசன் ஒரு மாறுபட்ட தோற்றத்தில் நடிக்கவுள்ளதாக தகவல் வெளியாகியுள்ளது.  இதற்காக அவருக்கு சிறப்பு பயிற்சிகள் வழங்க பல வெளிநாட்டு வல்லுநர்கள் விரைவில் சென்னைக்கு வரவழைக்கப்படவுள்ளனர்.

கமல் பிக்பாஸ்’ நிகழ்ச்சியின் போது, ஷங்கர் இயக்கத்தில் ‘இந்தியன் 2’ திரைப்படம் உருவாகவுள்ளதாக அறிவித்தார். இந்த படம் 1996ல் வெளியான ’இந்தியன்’ படத்தின் தொடர் பாகம் என கூறப்படுகிறது. 

1996ம் ஆண்டு வெளியான ’இந்தியன்’ முதல் பாக படத்தில், கமல்ஹாசன் இருவேறு விதமான கதாபாத்திரங்களை ஏற்று நடித்திருந்தார். அதாவது, 80 வயது முதியவர் கதாபாத்திரம் மற்றும் 25 வயது இளவயது கதாபாத்திரம் என இரட்டை வேடங்களில் நடித்து அசத்தியிருந்தார். அந்த படத்துக்காக கமல் சிறந்த நடிகருக்கான தேசிய விருதை பெற்றார். 

இந்நிலையில் இந்தியன் படத்தின் இரண்டாம் பாகம் 22 ஆண்டுகளுக்கு பிறகு மீண்டும் உருவாக்கபடவுள்ளது. முதல் பாகத்தில் இளவயது கமல் கொல்லப்பட்ட நிலையில், 80 வயது கமல்ஹாசன் வெளிநாட்டில் வாழ்ந்து வருவது போல முடிக்கப்பட்டிருக்கும்.

தற்பொது இந்த இரண்டாவது பாகம், முதல் பாகத்தில் தொடர்ச்சியாக உருவாக்கப்பட்டால், கமலின் கதாபாத்திரத்திற்கான 102 வயது என்று காட்ட வேண்டும். அதனடிப்படையில் தான் அவருக்கு வயதான முதியவருக்கான பயிற்சிகள் வழங்கபட இருப்பதாக தகவல் வெளிவந்துள்ளன. 

இதற்காக தான் அமெரிக்காவிலிருந்து உடல்பயிற்சி வழங்கும் நிபுணர்கள் விரைவில் சென்னைக்கு வரவுள்ளனர், அவர்கள் கமல்ஹாசனுக்கு உடலை பருமனாகச் செய்து, அதற்குரிய பயிற்சிகளை வழங்குவார்கள் என்று தகவல்கள் வெளிவந்துள்ளன. 

’இந்தியன் 2’ அறிவிப்பு வெளியானதில் இருந்தே மக்கள் மத்தியில் மிகப்பெரிய எதிர்பார்ப்புகள்  எழுந்துவிட்டது. மேலும், இதில் கதாநாயகியாக நடிக்க நயன்தாரா ஒப்பந்தம் செய்யப்பட்டிருப்பது குறிப்பிடத்தக்கது. ’இந்தியன் 2’ படப்பிடிப்பு அடுத்த வருடம் தொடங்கலாம் என எதிர்பார்க்கப்படுகிறது. 

மேலும் கமல்ஹாசன், ரம்யா கிருஷ்ணன், ஸ்ருதி ஹாசன் உள்ளிட்டோர் நடித்த வந்த சபாஷ் நாயுடு என்ற படம் பாதியில் நிற்கிறது. அதற்கான படப்பிடிப்பு வேலைகளும் விரைவில் தொடங்கும் என கூறப்படுகிறது. இதற்கிடையில் ’தேவர் மகன் 2’ படத்திற்கான அறிவிப்பையும் கமல்ஹாசன் வெளியிட்டார் என்பது குறிப்பிடத்தக்கது.