கமல்ஹாசனின் ‘தக் லைஃப்’ படக்குழுவினரோடு இணைந்த நடிகர் சிம்பு!
கமல்ஹாசன், மணிரத்னம் கூட்டணியில் உருவாகி வரும் 'தக் லைஃப்' படத்தின் ஷூட்டிங் தற்போது செர்பியாவில் நடந்து வருகிறது. இந்த படத்தில் கமல்ஹாசனோடு திரிஷா, துல்கர் சல்மான் மற்றும் ஜெயம் ரவி ஜோஜு ஜார்ஜ், கௌதம் கார்த்திக் மற்றும் ஐஸ்வர்யா லஷ்மி உள்ளிட்டோர் நடிக்க உள்ளதாக அறிவிக்கப்பட்டது.
ஆனால் இந்த படத்தில் இருந்து துல்கர் சல்மான் மற்றும் ஜெயம் ரவி விலகியுள்ளதாக தகவல்கள் வெளியாகியுள்ளன. அவர்கள் கொடுத்த தேதியில் தக்லைஃப் படக்குழுவினரால் அவர்களை வைத்து ஷூட்டிங் எடுக்க முடியாததால் அவர்கள் படத்தில் இருந்து விலகியதாக சொல்லப்படுகிறது.
அவர்களுக்கு பதில் சிம்பு மற்றும் அரவிந்த் சாமி நடிக்க உள்ளதாக சொல்லப்படுகிறது. இந்நிலையில் தேசிங் பெரியசாமி படத்துக்காக நீண்ட தலைமுடியை வைத்திருந்த சிம்பு இப்போது தக்லைஃப் படத்துக்காக கெட்டப் மாற்றப் போவதாக சொல்லப்படுகிறது. இதற்காக சமீபத்தில் அவருக்கு மும்பையில் லுக் டெஸ்ட் எடுக்கப்பட்டுள்ளதாக தகவல்கள் வெளியாகியுள்ளன.
