மோடி தமிழக மக்கள் வருத்தத்தை சம்பாதிக்கிறார் - கருணாநிதி

மோடி தமிழக மக்கள் வருத்தத்தை சம்பாதிக்கிறார் என்று திமுக தலைவர் மு.கருணாநிதி கூறியுள்ளார்.

திமுக தலைவர் கருணாநிதி அளித்த பேட்டி வருமாறு:–

கேள்வி : நேற்றைய தினம் மோடி ரஜினிகாந்த்தை சந்தித்ததைப் பற்றி, ரஜினிகாந்த் அவரை நல்ல நிர்வாகி என்று சொல்லியிருக்கிறாரே?

பதில் : ரஜினி பேசியதைப் பற்றியோ, அவர் சொன்னதைப் பற்றியோ “நோ கமெண்ட்ஸ்” நான் எதுவும் சொல்ல விரும்பவில்லை.

கேள்வி: இரண்டாவது கட்ட தேர்தல் பிரச்சாரத்தை முடித்திருக்கிறீர்கள். அதுபற்றி உங்கள் கருத்து?

பதில் : நான் மகிழ்ச்சி அடையத்தக்க அளவிற்கு இருந்தது.

கேள்வி : அதிமுக தொடர்ந்து ஒவ்வொரு கூட்டத்திலும் உங்களை சாடிக் கொண்டிருக்கிறார்களே?

பதில் : அவர்கள் ஆத்திரத்தில் இருக்கிறார்கள். தோல்வி பயம் அதிகமாகிவிட்டது. ஆகவே எங்களை சாடுகிறார்கள்.

கேள்வி : முதன்முதலாக நேற்று தமிழகத்தில் பேசிய மோடி, திமுக–அதிமுக ஆகிய இரண்டு கட்சிகளுக்குமே மக்களைப் பற்றி அக்கறை இல்லை என்று சொல்லியிருக்கிறாரே?

பதில் : தமிழ்நாட்டில் முதன்முதலாக பிரசாரத்தை தொடங்கி இருக்கிறார். அப்போது ஒரு அருமையான வாசகத்தை முதன்முதலாக வெளியிட்டிருக்கிறார். தமிழ்நாட்டு மக்களின் வருத்தத்தை சம்பாதிக்க வேறு காரணமே தேவை இல்லை என்று அவர் கூறினார்.