கொஞ்சம் கொஞ்சமாக சேமித்து அம்மாவுக்காக டிவி வாங்கிய டெலிவரி பாய்.. நெகிழ்ச்சியான வீடியோ..
ஸ்விக்கி டெலிவரி ஊழியர் ஒருவர் தனது குடும்பத்தினருக்கு புதிய ஸ்மார்ட் டிவி வாங்கிக் கொடுத்து ஆச்சரியப்படுத்திய வீடியோ சமூக வலைதளங்களில் வைரலாகி வருகிறது. தினமும் கடினமாக உழைத்து சம்பாதித்த பணத்தில் இருந்து சிறிது சிறிதாக சேமித்து, தனது குடும்பத்துக்காக இந்த டிவியை வாங்கியுள்ளார்.
வைரல் வீடியோவில், புதிய டிவியை வீட்டிற்கு கொண்டு வரும் டெலிவரி ஊழியர், அதை தனது தாய் மற்றும் பாட்டியிடம் வழங்குகிறார். நீண்ட நாட்களுக்கு பிறகு வீட்டில் புதிய டிவியை பார்த்த மகிழ்ச்சியில் இருவரும் உணர்ச்சிவசப்பட்டு கண்ணீர் மல்குகின்றனர். இந்த நெகிழ்ச்சியான காட்சி பார்ப்பவர்களின் மனதையும் தொட்டுள்ளது.
தான் ஸ்விக்கியில் வேலை செய்து, தினசரி வருமானத்தில் இருந்து கொஞ்சம் கொஞ்சமாக பணத்தை சேமித்து இந்த டிவியை வாங்கியதாக அந்த இளைஞர் தெரிவித்துள்ளார். பெரிய சம்பளம் இல்லாவிட்டாலும், குடும்பத்தின் ஆசையை நிறைவேற்ற வேண்டும் என்ற எண்ணத்துடன் அவர் தொடர்ந்து சேமித்தது பலரையும் பாராட்ட வைத்துள்ளது.
இந்த வீடியோவை ‘Raw India’ என்ற சமூக வலைதள கணக்கு வெளியிட்டதாக கூறப்படுகிறது. வீடியோ வெளியான சிறிது நேரத்திலேயே ஏராளமான பார்வைகளையும், லைக்குகளையும் பெற்றுள்ளது. பலரும் அந்த இளைஞரின் உழைப்பையும், குடும்பத்தின் மீது அவர் வைத்திருக்கும் அன்பையும் பாராட்டி கருத்துகளை பதிவிட்டு வருகின்றனர்.
“சிறிய சேமிப்பும் பெரிய சந்தோஷத்தை தரும்” என்பதை இந்த சம்பவம் அழகாக காட்டுகிறது. குடும்பத்தினருக்காக உழைத்து, அவர்களின் ஆசையை நிறைவேற்றிய அந்த டெலிவரி ஊழியரின் செயல் தற்போது இணையத்தில் பலரது பாராட்டையும் பெற்றுள்ளது.
Edited by Siva
