மு.க.அழகிரியை மறந்து நீண்ட நாட்கள் ஆகிறது - மு.கருணாநிதி

மு.க. அழகிரியை மறந்து நீண்ட நாள்கள் ஆவதாக திமுக தலைவர் கருணாநிதி கூறினார்.

இது தொடர்பாக நிருபர்களின் கேள்விகளுக்கு சென்னையில் ஞாயிற்றுக்கிழமை அவர் அளித்த பதில்:

கேள்வி: நாடாளுமன்றத் தேர்தலில் திமுகவின் தோல்விக்கு பொறுப்பேற்று கட்சியின் பொருளாளர் மு.க.ஸ்டாலின் ராஜிநாமா செய்து கடிதம் கொடுத்திருப்பதாக கூறப்படுகிறதே?

பதில்: அது பொய். தேர்தல் தோல்விக்கு பொறுப்பேற்று ராஜிநாமா செய்வதாக மட்டும் என்னிடம் வந்து சொன்னார்.

கேள்வி: மக்களவைத் தேர்தலில் திமுகவின் தோல்விக்கு காரணம் என்ன?

பதில்: வாக்குகள் குறைந்ததுதான்.

கேள்வி: தோல்வி குறித்து ஆராய கழகத்தின் உயர் நிலை செயல்திட்டக் குழு கூடுகிறதா?

பதில்: திமுக உயர் நிலை செயல் திட்டக் குழு மிக விரைவில் கூடி இதைப் பற்றி ஆய்வு செய்யும்.

கேள்வி: தன்னை விலக்கியதால்தான் திமுகவுக்கு தோல்வி ஏற்பட்டது என அழகிரி சொல்லியிருக்கிறாரே?

பதில்: அவரை நானும், திமுகவும் மறந்து பல நாள்கள் ஆகின்றன. அவர் திமுகவில் இருக்கும்போதே இரண்டு, மூன்று முறை திமுக படுதோல்வி அடைந்திருக்கிறது.

கேள்வி: மு.க.ஸ்டாலின் ராஜிநாமா செய்வதை ஒரு நாடகம் என அழகிரி கூறியிருக்கிறாரே?

பதில்: அவரைப் பற்றி நான் இனியும் பேச விரும்பவில்லை. நான் முன்பே கூறியதைப் போல அவரை நான் மறந்து நீண்ட நாளாகிறது.