சிம்புவுக்கு ஜோடியாகும் கயடு லோஹர்… மேலும் ஒரு கன்னட வரவு!

சிம்பு நடிக்கவுள்ள வெந்து தணிந்தது காடு படத்தில் அவருக்கு கதாநாயகியாக கயடு லோஹர் என்ற கன்னட நடிகை நடிக்க உள்ளதாக சொல்லப்படுகிறது.

கௌதம் மேனன் – சிலம்பரசன் காம்போவில் முன்னதாக விண்ணை தாண்டி வருவாயா, அச்சம் என்பது மடமையடா போன்ற படங்கள் ஹிட் அடித்த நிலையில் அடுத்து இருவர் கூட்டணியில் உருவாகியுள்ள படம் “வெந்து தணிந்தது காடு”. இந்த படத்திற்கு ஏ.ஆர்.ரகுமான் இசையமைக்க, வேல்ஸ் ப்லிம் இண்டர்நேஷனல் தயாரித்துள்ளது. முன்னதாக இந்த படத்துக்கு நதிகளில் நீராடும் சூரியன் எனப் பெயர் வைக்கப்பட்டது.

இந்த படத்தின் மூலமாக இயக்குனர் கௌதம் மேனன் முதல் முதலாக கிராமத்துக் கதை ஒன்றை இயக்க உள்ளதாக சொல்லப்படுகிறது. இந்த படத்துக்காக சிம்பு 15 கிலோ எடை குறைத்துள்ளதாக இயக்குனர் கௌதம் மேனன் பகிர்ந்துள்ளார். இப்போது இந்த படத்தின் படப்பிடிப்புப் பணிகள் திருச்செந்தூரில் நடந்து வருகிறது. இந்நிலையில் படப்பிடிப்புத் தளத்தில் சிம்பு நடிகை ராதிகாவோடு இருக்கும் புகைப்படம் இணையத்தில் வெளியாகி கவனத்தைப் பெற்றது.

படப்பிடிப்பு தொடங்கி விட்டாலும் இந்த படத்துக்கான கதாநாயகி யார் என்று அறிவிக்கப்படவில்லை. இந்நிலையில் கன்னடாவில் சில படங்களில் நடித்துள்ள கயடு லோஹர் கதாநாயகியாக தேர்வு செய்யப்பட வாய்ப்புள்ளதாக சொல்லப்படுகிறது.