இந்திய ஹாக்கியின் வீழ்ச்சிக்கு...3 வியாழன், 13 மார்ச் 2008( 16:55 IST )

இந்திய ஹாக்கிக் கூட்டமைப்பே முக்கிய காரணம்! சர்வதேச போட்டிகளில் ஒரு காலத்தில் கொடி கட்டிப் பறந்த இந்தியா, இன்று சர்வதேசப் போட்டிகளில் திணறிக் கொண்டிருப்பதற்கு காரணம், ஹாக்கியை மேம்படுத்தும் நடவடிக்கைகளில் இந்திய ஹாக்கி கூட்டமைப்பு ஈடுபடவில்லை என்பதை மறைவின்றி எடுத்துக்கூறும் வகையில் சர்வதேச ஒலிம்பிக் கூட்டமைப்பு ஒரு கடிதத்தை இந்திய ஹாக்கி கூட்டமைப்பிற்கு நேற்று அனுப்பியுள்ளது. webdunia photo FILE சாண்டியாகோவில் நடந்த தகுதிப் போட்டிகளில் தோற்றதால் ஒலிம்பிக் போட்டிகளுக்கு தகுதி பெறும் வாய்ப்பை இந்திய அணி இழந்துவிட்ட நிலையில், இந்திய ஹாக்கியை மேம்படுத்த தாங்கள் அளித்த ‘இந்திய ஹாக்கி மேம்பாட்டுத் திட்டத்தை உடனடியாக செயல்படுத்துமாறு சர்வதேச ஹாக்கி கூட்டமைப்பின் தலைவரான எல்ஸ் வான் பிரீடா விரீஸ்மேன் இந்திய ஹாக்கி கூட்டமைப்பிற்கு நெருக்குதல் தந்துள்ளார். சர்வதேச ஹாக்கி கூட்டமைப்பு தனது திட்டத்தை ஏற்கனவே அனுப்பி அதனை உடனடியாக நடைமுறைப்படுத்துமாறும், அத்திட்டத்தை நடைமுறைப்படுத்துவதில் புகழ்பெற்ற முன்னாள் ஹாக்கி வீரர் ரிக் சார்ஸ்வொர்த் ஈடுபடுவார் என்றும் தெரிவித்திருந்தது. இத்திட்டம் ஏற்கனவே தொடங்கப்பட்டிருக்க வேண்டும், ஆனால் வெளியில் இருந்து வந்த இத்திட்டத்தை ஏற்க இந்திய ஹாக்கி கூட்டமைப்பு தயக்கம் காட்டி வந்தது. “ஒலிம்பிக் போட்டிகளுக்கு தகுதிபெறத் தவறிவிட்ட நிலையில் தனது திட்டத்தை இதற்கு மேலும் தாமதப்படுத்தாமல் நிறைவேற்றுமாறு” இந்திய ஹாக்கி கூட்டமைப்பிற்கு நெருக்குதல் கொடுத்துள்ள சர்வதேச ஹாக்கி கூட்டமைப்பு, “இத்திட்டத்தின் வெற்றியைப் பெறுத்தே 2010 ஆம் ஆண்டில் டெல்லியில் உலகக் கோப்பை போட்டிகளை நடத்துவது குறித்து இறுதி முடிவு எடுக்கப்படும்” என்று கூறியுள்ளது. அதாவது எங்களது திட்டத்தை ஏற்கத் தவறினால், உலகக் கோப்பை போட்டிகளை நடத்தலாம் என்ற உங்கள் கனவு நிறைவேறாது என்று நேரடியாக கூறியுள்ளது சர்வதேச ஹாக்கி கூட்டமைப்பு. இந்திய ஹாக்கியின் நிலை எந்த அளவிற்கு கீழிறக்கப்பட்டுவிட்டது! இந்திய ஹாக்கியை மேம்படுத்த சர்வதேச ஹாக்கி கூட்டமைப்பு வரவேண்டும் என்ற நிலைக்கு நமது ஹாக்கியை கீழிறக்கிய அந்த புனிதப் பொறுப்பு இந்திய ஹாக்கி கூட்டமைப்பையே சேரும். எப்படிப்பட்ட பெருமை! ஹாக்கி உலகின் முடிசூடா மன்னர்களாக திகழ்ந்த நமக்கு, இன்று அந்த விளையாட்டை மேம்படுத்த அயல் நாட்டு வீரர் ஒருவரின் தலைமையிலான ஒரு திட்டம் செயல்படுத்தப்படக்கூடிய நிலை ஏற்பட்டுவிட்டது. இந்திய ஹாக்கியை அதன் உன்னத நிலையில் தக்கவைக்கத் தவறியதே இந்திய ஹாக்கி கூட்டமைப்பின் இயலாமைக்கு சரியான சான்றாகும்.