நமது நாட்டிலுள்ள முஸ்லிம்களின் புனிதத் தலங்களில் முதன்மையானதும், முஸ்லிம்கள் மட்டுமின்றி அனைத்து மதத்தினரும் வழிபடும் புகழ்பெற்ற புனிதத்தலமாகவும், ராஜஸ்தான் மாநிலம் அஜ்மீரில் உள்ள க்வாஜா மொய்ன்-உத்-தீன் சிஸ்தியின் தர்காவாகும்.
க்வாஜா மொய்ன்-உத்-தின் சிஸ்தி எனும் முஸ்லிம் ஞானி புதைக்கப்பட்ட இடமே இந்த தர்காவாகும். இஸ்லாத்தை இந்தியாவில் வேரூன்றச் செய்த சூஃபி மகான்களில் மிகவும் பிரசித்திப் பெற்றவர் மொய்ன்-உத்-தின் சிஸ்தி ஆவார். இவரைப் பின்பற்றி ஏராளமான சூஃபி மகான்கள் தோன்றியுள்ளனர். தங்களின் பக்தியாலும், சேவைகளாலும், அன்பாலும் சூஃபி மகான்கள் இஸ்லாத்தை பரப்புவதில் பெரும் பங்காற்றினர்.
க்வாஜா மொய்ன்-உத்-தின் சிஸ்தி, 1190 முதல் 1232ல் தனது உடலை துறக்கும் வரை இங்குதான் வாழ்ந்தார். அவர் புதைக்கப்பட்ட அந்தக் கல்லறையே வழிபாட்டிற்குரியதாகவும், புனிதத்தத் தலமாகவும் திகழ்கிறது.
அவருடைய கல்லறையின் மீது வைக்கப்பட்டுள்ள கிரீடம் முழுக்க முழுக்க தங்கத்தால் ஆனது. கல்லறையின் முன் பகுதியில் மொகலாயப் பேரரசர் ஷாஜஹான் ஒரு பெரும் மசூதியைக் கட்டியுள்ளார்.
ஷாஜஹானுக்குப் பின் வந்த மொகலாயப் பேரரசர்கள் சிஸ்தியின் கல்லறையை மையமாக வைத்து இந்த தர்காவை கட்டி முடித்துள்ளனர். ஒரு நேரத்தில் சாதாரண கல்லறை மட்டுமே இருந்த இவ்விடம், இன்று பல மசூதிகளையும், தங்குமிடங்களையும், வழிகளையும் கொண்ட மிகப் பெரிய கட்டுமாணமாக உருவாகியுள்ளது. ஹஸ்ரத் க்வாஜா மொய்ன்-உத்-தீன் சிஸ்தி தர்காவிற்கு, தர்கா பஜார் என்ற சாலையின் வழியாகச் செல்ல வேண்டும். தர்காவின் வாயில் கதவுகள் வெள்ளியால் கலை வேலைப்பாடுகளுடன் அமைக்கப்பட்டுள்ளன. மொய்ன்-உத்-தீன் சமாதியைச் சுற்றி வெள்ளியாலான வேலி அமைக்கப்பட்டுள்ளது. இங்கு பிரார்த்தனை செய்ய பெண்களுக்கு தனி அறை உள்ளது.
|
ஆன்மிகம் > புனிதப் பயணம் > கட்டுரைகள்
