முதன்மை பக்கம் » இதர வாசிப்பு » இலக்கியம் » கவிதைகள் » காற்றைத் தேடி (Find the Air | Unnadham Book | Good Poem)
Feedback
Print
காற்றைத் தேடி 
பசுவய்யா
புதன், 4 நவம்பர் 2009( 16:56 IST )
webdunia photo
WDகாற்றின் நஞ்சை இழுத்து
திணறிற்று என் மூச்சுக் குழாய்
மேற்குக் கடலோரம் சென்றால்
கலப்படம் குறைந்த காற்று
கிடைக்கும் என்றார்கள்.
மேலும் தொடர்ந்து சென்றால்
வெகு தொலைவில்
வேறு திசைகளில்
வெவ்வேறு வெளிகளில்
காற்றின் எச்சம்
காணக் கிடைக்கும்
என்றார்கள்.
கடலில் நீச்சலடித்துச் சென்றால்
அடிவானம் தாண்டியதும்
காற்றுக் கிடைக்கலாம்
என்றார்கள்.
பறக்கத் தெரிந்தால்
மேக மண்டலங்களைத் தாண்டி
காற்றை இழுக்கலாம்
என்றார்கள்.
நான் ஆயத்தமானேன்.
அப்போது எனக்கு
தாகம் எடுத்து
நா வரண்டு
தலையும் சுற்றிற்று.
`குடிநீர் குடிநீர்' என்று
முனகத் தொடங்கினேன்
`காற்றிடம்தான் கேட்க வேண்டும்'
என்றார்கள்.
நன்றி : உன்னதம்
ஏப்ரல் 94,
காலாண்டிதழ் 2