பள்ளிகளில் பயன்படுத்தப்படும் முறையற்ற வடிவங்களில் உள்ள இருக்கைகளில் அமரும் மாணவர்களுக்கு கழுத்து வலியும், முதுகு வலியும் அதிகமாக வருகிறது என்று ஆஸ்ட்ரேலியாவில் நடத்தப்பட்ட ஆய்வு தெரிவிக்கிறது.
பெரும்பாலான மாணவர்கள் கழுத்து, முதுகு வலியினால் பாதிக்கப்படுவதற்கான காரணங்கள் குறித்து கிரிஃப்டின் பல்கலைக் கழக ஆய்வாளர் நெய்ல் டியூட்டில் ஆய்வு செய்தார்.
இதற்காக புமோகிராஃப் (bumograph) என்ற கருவியை உருவாக்கினார். அந்தக் கருவியில் 96 உணரும் உறுப்புகள் இருந்தன. அவை, உட்காரும்போது உள்ள உடலமைப்பு, சாய்மானம போன்ற பல தகவல்களைத் திரட்டி உரிய அளவுகளில் கொடுத்தன.
அவற்றின் மூலம் பாதிப்பிற்கான காரணம் அறிவியல் அடிப்படையில் கணக்கிடப்பட்டது. அதன்படி, மாணவர்கள் உட்காரும்போது அவர்களின் உடல் எடை, உயரம் அல்லது உட்காரும் முறை ஆகியவற்றினால் இடுப்புப் பகுதிகள் பாதிக்கப்படுகின்றன.
இடுப்புப் பகுதிகள் ஆண்களுக்கு குறுகலாகவும், பெண்களுக்கு அகலமாகவும் தட்டையாகவும் உள்ளதால் அதற்கு ஏற்றவகையில் பாதிப்புகளும் வருகின்றன.
ஆனால், பொதுவாகத் தயாரிக்கப்படும் இருக்கைகள் இவற்றைக் கணக்கில் கொண்டு தயாரிக்கப்படுவது இல்லை. எனவே, இந்த இருக்கைகள் பெரும்பாலான மாணவர்களுக்குப் பொறுத்தமாக இருப்பதில்லை.
மாணவர்கள் உட்காரும்போது அவர்கள் உடலின் முன்னமைப்பு, பின்னமைப்பு ஆகியவை, பொறுத்தமாக வசதியாக உட்காருவதை முடிவு செய்கின்றன. ஆனால், இந்த இரண்டும்தான் இருக்கைகள் தயாரிப்பில் கணக்கிடப்படுவதில்லை.
எனவே மாணவர்களை வலியிலிருந்து பாதுகாக்க வேண்டும் என்றால், மாற்றியமைக்கத்தக்க, வசதியான இருக்கைகளை பள்ளி நிர்வாகங்கள் வாங்கவேண்டும் என்று டியூட்டில் தெரிவித்துள்ளார்.
|
இதர வாசிப்புக்கு > நலமுடன் வாழ > மருத்துவ செய்திகள்
