நமது உடலின் உயரம் நமது வாழ்க்கையின் தரத்தையும் பாதிக்கிறது என்று டென்மார்க்கில் நடத்தப்பட்ட ஆய்வு தெரிவிக்கிறது.
டென்மார்க்கில் உள்ள நோவோ நார்டிஸ்க் மையத்தைச் சேர்ந்த உடல்நலம் சார்ந்த பொருளாதார வல்லுநர் டார்ஸ்டன் கிறிஸ்டென்சன் தலைமையில், 'உயரத்திற்கும் உடல்நலம் சார்ந்த வாழ்க்கைத் தரத்திற்கும் உள்ள தொடர்பு' என்ற தலைப்பில் ஆய்வு நடத்தப்பட்டது.
இதில், நமது உயரம் எவ்வளவு குறைவாக உள்ளதோ அவ்வளவு அதிகமாக உடல்நலமும். மனநலமும் பாதிக்கப்படுகிறது என்று தெரியவந்துள்ளது.
கிறிஸ்டென்சன் கூறுகையில், ''உயரம் குறைவாக உள்ளவர்கள் தங்களின் வாழ்வில் கல்வி, வேலைவாய்ப்பு, மற்றவர்களுடன் உள்ள நட்புறவு ஆகியவற்றில் சிரமங்களைச் சந்திக்கிறார்கள்.
இருந்தாலும் உயரத்திற்கும் மன நிலைக்கும் உள்ள தொடர்பு மிகச் சரியாக நிரூபிக்கப்படவில்லை.
உடல்நலம், மனநலம் சார்ந்த சிக்கல்களை உயரமானவர்களை விடக் குறைவாக உணர்ந்ததாகவே குட்டையானவர்கள் தெரிவிக்கின்றனர் என்று ஆய்வில் கண்டறிந்தோம்'' என்றார்.
உயரத்திற்கும் உடல்நலம் சார்ந்த வாழ்க்கைத் தரத்திற்கும் உள்ள தொடர்பு குறித்து நடத்தப்பட்ட இந்த ஆய்வில், முன்பு கிடைத்த கருத்துக் கணிப்பின் முடிவு ஆதாரமாகக் கொள்ளப்பட்டது.
கடந்த 2003- ஆம் ஆண்டில் நடத்தப்பட்ட கருத்துக் கணிப்பில் 14,416 பேர் பங்கேற்றனர். அவர்களிடம் உடல்நலம் சார்ந்த வாழ்க்கைத் தரம் (health-related quality of life (HRQoL)) தொடர்பான வினாத்தாள் கொடுக்கப்பட்டது.
கருத்துக் கணிப்பில் பங்கேற்றவர்களின் உடல்நலம் எப்படி உள்ளது என்பதைவிட, அவர்கள் தங்களின் உடல் நலத்தைப்பற்றி என்ன நினைக்கிறார்கள் என்பதை அளவிடவே வினாத்தாள் பயன்படுத்தப்பட்டது.
அதில், சுய பாதுகாப்பு, அன்றாட நடவடிக்கைகள், வலி, பாதுகாப்பின்மை, மனஅழுத்தம், கோபம், சுதந்திரமான செயல்பாடு ஆகியவற்றின் அனுபவத்தை வெளிக் கொண்டுவரும் வகையில் கேள்விகள் இருந்தன.
அவற்றுக்கு அளிக்கப்பட்ட விடைகளை ஆய்வாளர்கள் ஆராய்ந்தனர். அதில், சமூகப் பிரிவு, நீண்டநாள் நோய்கள், உடல் எடை, பால், வயது ஆகியவை தொடர்பான கொடுக்கப்பட்டிருந்த விடைகள் HRQoL குறிட்டைச் சுட்டிக் காட்டின.
அதனடிப்படையில் மனிதர்களின் வாழ்க்கைத் தரம் உயரத்தைப் பொறுத்து மாறுபடுகிறது என்று முடிவு செய்யப்பட்டது.
அதாவது, 162 செ.மீ க்குக் குறைவான உயரமுள்ள ஆண்கள், 151 செ.மீ க்குக் குறைவான உயரமுள்ள பெண்கள் ஆகியோரின் HRQoL குறியீடு குறைவாக இருந்தது.
உயரம் சிறிது அதிகரித்தாலும் குட்டையானவர்களின் வாழ்க்கையில் சாதகமான முன்னேற்றம் ஏற்படுகிறது என்றும் இந்த ஆய்வில் தெரியவந்தது.
ஆண்களுக்கு 7 செ.மீ, பெண்களுக்கு 6 செ.மீ என்று அதிகரித்தால் அவர்களின் HRQoL குறியீடு 6.1 விழுக்காடு அதிகரிக்கிறது என்று ஆய்வாளர்கள் முடிவு செய்துள்ளனர்.
|
இதர வாசிப்புக்கு > நலமுடன் வாழ > கட்டுரைகள்
