சிட்னி டென்னிஸ்: தொடரும் சானிய-ஹிங்கிஸ் வெற்றி பயணம்
சிட்னியில் நடைபெற்று வரும் சர்வதேச டென்னிஸ் போட்டியில், நேற்று நடைபெற்ற இறுதிப்போட்டியில் சானியா-ஹிங்கிஸ் ஜோடி சாம்பியன் பட்டத்தை கைப்பற்றியுள்ளனர்.
இறுதிப்போட்டியில் பிரான்ஸின் கிரேஸியா-மெல்டிநோவிக் ஜோடியை எதிர்கொண்ட சானியா-ஹிங்கிஸ் ஜோடி 1-6 என்ற கணக்கில் முதல் செட்டை இழந்தாலும், இரண்டாவது சுற்றின் தொடக்கத்தில் ஆதிக்கம் செலுத்திய பிரான்ஸ் ஜோடியை சானியா ஜோடியின் அதிரடி ஆட்டம் பின்னுக்கு தள்ளியது.
இரண்டாவது சுற்றை சானியா ஜோடி 7-5 என்ற கணக்கில் கைப்பற்றியது. ஆளுக்கு ஒரு செட்டை கைப்பற்றிய நிலையில் மழை குறுக்கிட்டது. பின்னர் தொடங்கிய டை-பிரேக் போட்டியில் சானியா-ஹிங்கிஸ் அதிரடி ஆட்டத்தின் மூலம் அந்த செட்டை 10-5 என்ற கணக்கில் கைப்பற்றி, சாம்பியன் பட்டத்தை தட்டிச் சென்றது.
சானியா-ஹிங்கிஸ் ஜோடி தொடர்ந்து பெறும் 30 வது வெற்றி இதுவாகும். மேலும் 2015 லிருந்து அவர்கள் கைப்பற்றும் 10 வது சாம்பியன் பட்டம் இது. இதில் விம்பிள்டன், அமெரிக்க ஓப்பன் உள்ளிட்ட முக்கிய போட்டிகள் அடங்கும்.
