நாங்க சாம்பியன்! : ஐசிசி டெஸ்ட் தரவரிசையில் இந்தியா முதலிடம்

இரண்டாவது கிரிக்கெட் டெஸ்ட் போட்டியில், 178 ரன்கள் வித்தியாசத்தில் வெற்றி பெற்றதை அடுத்து இந்திய அணி, ஐசிசி டெஸ்ட் தரவரிசைப் பட்டியலில் மீண்டும் முதலிடத்தை கைப்பற்றியுள்ளது.

இந்தியாவிற்கு சுற்றுப்பயணம் மேற்கொண்டுள்ள நியூசிலாந்து 3 டெஸ்ட் போட்டிகள் கொண்ட தொடரில் விளையாடி வருகிறது. இந்த தொடரின் முதல் டெஸ்ட் போட்டி கான்பூரில் நடைபெற்றது. அதில், இந்திய அணி 197 ரன்கள் வித்தியாசத்தில் நியூசிலாந்து அணியை வீழ்த்தி அபார வெற்றி பெற்றது. இது இந்தியாவின் 500-வது டெஸ்ட் போட்டி என்பது குறிப்பிடத்தக்கது.

இந்நிலையில், கொல்கத்தா ஈடன் கார்டன் மைதானத்தில் செப்டம்பர் 30ஆம் தேதி தொடங்கிய இரண்டாவது டெஸ்ட் போட்டியில் இந்திய அணி 178 ரன்கள் வித்தியாசத்தில் அபார வெற்றி பெற்றது.

இதன் மூலம், மூன்று டெஸ்ட் போட்டி கொண்ட தொடரில், இரண்டில் வென்று டெஸ்ட் தொடரை கைப்பற்றியுள்ளது. மேலும், சர்வதேச கிரிக்கெட் கவுன்சிலின் [ஐசிசி] டெஸ்ட் தரவரிசைப் பட்டியலில் முதலிடத்தை இந்தியா மீண்டும் கைப்பற்றியுள்ளது.